६ जेठ २०८३ काठमाडौं – अर्थमन्त्री स्वर्णिम वाग्ले ले नेपाललाई सम्पत्ति शुद्धीकरणसम्बन्धी ‘ग्रे लिस्ट’बाट बाहिर निकाल्न सरकारले सबै उपाय अवलम्बन गर्ने बताएका छन् । अर्थ मन्त्रालयमा एपीजीको इन्टरनेसनल कोअपरेसन रिभ्यु ग्रुप (आइसिआरजि) कार्ययोजनाबारे भएको छलफलमा उनले सुशासन र आर्थिक पारदर्शितालाई सरकारको प्रमुख प्राथमिकता बनाइएको बताए ।

अर्थमन्त्री वाग्लेले हालको अवस्था विगत ३० वर्षको कुशासनको परिणाम भएको उल्लेख गर्दै नयाँ सरकारले सुधारका काम तीव्र रूपमा अघि बढाएको दाबी गरे । कार्यक्रममा एपीजी उपकार्यकारी सचिव डेभिड स्यान्ननले नेपालले ग्रे लिस्टबाट बाहिरिन अझै पर्याप्त काम गर्न बाँकी रहेको बताएका थिए । नेपाललाई एफएटीएफले २०८१ फागुन ९ गते दुई वर्षका लागि ग्रे लिस्टमा राखेको थियो ।