२८ बैशाख २०८३ काठमाडौं- संघीय संसद्को बजेट अधिवेशन आजदेखि सुरु हुँदैछ । सरकारको सिफारिसमा राष्ट्रपति रामचन्द्र पौडेल ले अधिवेशन आह्वान गरेका हुन् ।

आज दिउँसो २ बजे प्रतिनिधि सभा र राष्ट्रिय सभाको बैठक छुट्टाछुट्टै बस्ने कार्यसूची रहेको छ । प्रतिनिधि सभाको बैठकमा प्रतिनिधि सभा नियमावली मस्यौदा समितिका सभापति गणेश पराजुलीले समितिको प्रतिवेदन पेश गर्ने कार्यसूची तय गरिएको छ ।

त्यसैगरी सरकारले ल्याएका विभिन्न अध्यादेश पनि आजको बैठकमा पेश गरिनेछ । साथै सभामुखले अधिवेशन अवधिभर बैठकको अध्यक्षता गर्ने सदस्यहरूको मनोनयन गर्ने कार्यसूची पनि रहेको संसद् सचिवालयले जनाएको छ ।

यता राष्ट्रिय सभाको आजको बैठकमा पनि सरकारले ल्याएका अध्यादेश पेश गरिने कार्यसूची रहेको छ । बजेट अधिवेशन सुरु भएसँगै आगामी आर्थिक वर्षको नीति तथा कार्यक्रम र बजेटमाथिको छलफलले तीव्रता पाउने अपेक्षा गरिएको छ ।