२२ बैशाख २०८३ काठमाडौं- जल तथा मौसम विज्ञान विभाग का अनुसार हाल नेपालमा पश्चिमी तथा स्थानीय वायुको प्रभावसँगै पूर्वी भू-भाग नजिक तल्लो वायुमण्डलमा रहेको न्यून चापीय क्षेत्र सक्रिय रहेको छ। यसका कारण देशभर पूर्णतया बादल लागेको छ भने कोशी, मधेश, बागमती र गण्डकी प्रदेश का धेरै स्थानहरूमा मेघगर्जन तथा चट्याङ्गसहित मध्यम वर्षा भइरहेको छ।

आज दिउँसो पहाडी र हिमाली भू-भागमा सामान्यतया बदली रहनेछ भने तराई क्षेत्रमा आंशिक बदली रहने अनुमान गरिएको छ। कोशी र गण्डकी प्रदेशका केही स्थानहरूमा तथा अन्य प्रदेशका थोरै स्थानहरूमा मेघगर्जन/चट्याङ्गसहित मध्यम वर्षा तथा उच्च हिमाली क्षेत्रमा हिमपातको सम्भावना रहेको विभागले जनाएको छ।

आज राति पनि कोशी, मधेश, बागमती र गण्डकी प्रदेशमा सामान्य बदली रहनेछ भने अन्य प्रदेशमा आंशिक बदली रहनेछ। ती प्रदेशका थोरै स्थानहरूमा मेघगर्जनसहित मध्यम वर्षा र बाँकी प्रदेशका एक-दुई स्थानमा हल्का वर्षा वा हिमपात हुन सक्ने पूर्वानुमान गरिएको छ। विभागले मौसम प्रतिकूल हुन सक्ने भन्दै आवश्यक सतर्कता अपनाउन सर्वसाधारणलाई आग्रह गरेको छ।