३ चैत,२०८२ काठमाडौं- नवनिर्वाचित प्रतिनिधिसभा सदस्यहरूको पद तथा गोपनीयताको शपथ र प्रारम्भिक बैठकहरू सिंहदरबार भित्र पुतली बगैँचा मा निर्माणाधीन नयाँ संसद् भवनको बहुउद्देश्यीय हलमा हुने भएका छन्। नयाँ संसद् भवनमा बैठकका लागि बनाइँदै गरेको मुख्य हल समयमै निर्माण सम्पन्न नहुने देखिएपछि संघीय संसद् सचिवालय ले तत्कालका लागि बहुउद्देश्यीय हल प्रयोग गर्ने तयारी गरेको हो।

सचिवालयका प्रवक्ता सहसचिव एकराम गिरी का अनुसार शपथ ग्रहण र प्रारम्भिक बैठक सञ्चालनका लागि वैकल्पिक हलको व्यवस्था गरिँदैछ। उनका अनुसार उक्त हल तीन दिनभित्र प्रयोगका लागि तयार हुने अपेक्षा गरिएको छ।

गत फागुन २१ गते सम्पन्न प्रतिनिधिसभा निर्वाचनबाट नयाँ सांसदहरू निर्वाचित भएका छन्। उनीहरूको शपथ कहिले हुने र प्रतिनिधिसभाको पहिलो बैठक कहिले बस्ने भन्ने मिति भने अझै तय भइसकेको छैन।