२६ फाल्गुन,२०८२ काठमाडौं- पछिल्लो समय काठमाडौं उपत्यकासहित देशका प्रमुख शहरमा वायु प्रदूषण अत्यधिक बढ्दा स्वास्थ्य तथा जनसंख्या मन्त्रालयले आम नागरिकलाई विशेष सतर्क रहन आग्रह गरेको छ।

मन्त्रालयका प्रवक्ता डा. प्रकाश बुढाथोकीका अनुसार काठमाडौं, पोखरा, विराटनगर लगायत तराईका क्षेत्रका हावामा हानिकारक पर्टिकुलेट म्याटर (PM 2.5) को मात्रा उच्च छ। प्रदूषणले आँखामा दुखाइ, छालामा समस्या, मुटु, मिर्गौला, श्वासप्रश्वाससम्बन्धी रोग र क्यान्सरको जोखिम बढाउन सक्छ।

मन्त्रालयले बिहान र बेलुकाको समयमा अनावश्यक घरबाहिर ननिस्कन, बाहिर निस्कनुपरे मास्क लगाउन, चस्मा र शरीर छोपिने कपडा प्रयोग गर्न सुझाएको छ। साथै उद्योग, सवारी, कृषि र फोहोर व्यवस्थापनमा समन्वय गर्दै प्रदूषण न्यूनीकरणमा पहल जारी रहेको जनाएको छ।