नेपाली सेनाका पूर्वरथी बालानन्द शर्मा परराष्ट्रमन्त्री बन्ने भएका छन्। उनको आजै शपथग्रहण हुने तय भएको छ।

प्रधान सेनापति बन्ने दौडमा रहे पनि उक्त जिम्मेवारी नपाएका शर्मा त्यसयता भने राज्यका विभिन्न महत्त्वपूर्ण जिम्मेवारीमा सक्रिय रहँदै आएका थिए। शान्ति प्रक्रियाको महत्त्वपूर्ण चरण मानिने माओवादी लडाकु समायोजन समितिमा उनले निर्णायक भूमिका निर्वाह गरेका थिए।

शर्मा माओवादी लडाकु समायोजनमार्फत शान्ति प्रक्रिया टुंग्याउने पात्रमध्ये एक मात्र नभई कोभिड–१९ महामारीका बेला कोभिड क्राइसिस म्यानेजमेन्ट सेन्टर (सीसीएमसी) मा समेत कार्यरत थिए।

सुरक्षा, शान्ति प्रक्रिया र संकट व्यवस्थापनमा अनुभव बटुलेका शर्माको परराष्ट्रमन्त्री नियुक्तिलाई अर्थपूर्ण रूपमा हेरिएको छ।