कात्तिक २३, २०८२ काठमाडौं— नेपालको शेयर बजार आज पनि ओरालो लागेको छ। गत बिहीबारदेखि घट्ने क्रम जारी रहँदा आज नेप्से सूचक ३०.०२ अंकले घटेर २५६६.०९ बिन्दुमा पुगेको छ। आज ३२३ कम्पनीका १ करोड ६ लाख १९ हजार कित्ता शेयर किनबेच हुँदा कारोबार रकम ४ अर्ब ९० करोड रुपैयाँभन्दा बढी पुगेको छ।

साना र अनुभवहीन लगानीकर्ताको आत्तिएको व्यवहार र बजारमा बढ्दो बिक्री दबाब नै बजार घट्ने मुख्य कारण बताइएको छ। राजनीतिक अनिश्चितता, धितोपत्र बोर्डमा आन्दोलन र नियामक निकायको निष्क्रियताले लगानीकर्ताको विश्वास कमजोर बनाएको विशेषज्ञहरूको भनाइ छ।

आज १३ वटै उपसूचक राताम्य भएका छन्। वाणिज्य बैंक, विकास बैंक, फाइनान्स, र होटल तथा पर्यटन समूह सबैमा गिरावट देखिएको छ।