कात्तिक १८, २०८२ काठमाडौं— नेकपा (एकीकृत समाजवादी)का सम्मानित नेता झलनाथ खनालले अब कहिल्यै नफुट्ने प्रतिबद्धतासहित कम्युनिस्ट एकता अघि बढाउन आग्रह गरेका छन्।

बुधबार काठमाडौंमा आयोजित ‘नेपाली कम्युनिस्ट पार्टी’ एकता घोषणा सभामा बोल्दै उनले विगतका विभाजन दोहोरिन नदिन सबै घटक एक भएर अघि बढ्नुपर्ने बताए।

खनालले भने, “आज हामी सबै एकताका लागि जुटेका छौं। अब हामी कहिल्यै फुट्ने छैनौं, यो संकल्पका साथ अघि बढौं।”

उनले विगतमा पनि कम्युनिस्ट एकता भएका तर “ए बेग्लै, कता कता” भएर फुटेको स्मरण गर्दै अहिले नयाँ सोचसहित एकता स्थायी बनाउनुपर्ने बताए। साथै, खनालले कम्युनिस्टहरूबीच आरोप–प्रत्यारोप नगरी सहकार्य र विश्वासको आधारमा अघि बढ्न पनि आह्वान गरे।