कात्तिक १८, २०८२ काठमाडौं— जेनजी आन्दोलनका क्रममा न्यायालय परिसरमा भएका तोडफोड र आगजनी घटनाको अनुसन्धान गर्न सर्वोच्च अदालत र काठमाडौं जिल्ला अदालतले प्रहरीमा जाहेरी दिएका छन्।

दुवै अदालतले जिल्ला प्रहरी परिसर भद्रकाली, काठमाडौंमा जाहेरी दर्ता गराएका हुन्। परिसरका प्रमुख एसएसपी रमेश थापाका अनुसार अदालतका तर्फबाट दर्ता भएको जाहेरीमा आन्दोलनका क्रममा न्यायालयलाई लक्षित गरेर गरिएको तोडफोड, आगजनी र सार्वजनिक सम्पत्तिमा पुगेको क्षतिसम्बन्धी विवरण समावेश छ।

गत भदौ २३ र २४ गते भएको जेनजी आन्दोलनका क्रममा सर्वोच्च अदालत परिसरमा ठूलो क्षति पुगेको थियो। आन्दोलनकारीहरूले अदालत परिसरमा रहेका सवारीसाधन, कागजात र संरचनामा आगजनी तथा तोडफोड गरेका थिए।