असोज १०, २०८२ काठमाडौं– मौसम पूर्वानुमान महाशाखाले हाल देशभर मनसुनी वायूको प्रभाव कमजोर रहेको जानकारी दिएको छ। हाल स्थानीय वायूको आंशिक प्रभाव देखिएको महाशाखाले जनाएको छ।

हालको अवस्थाबारे महाशाखाले जनाएको छ कि, देशका पहाडी भू-भागमा आंशिक बदली रहँदा बाँकी भू-भागमा मौसम मुख्यतया सफा रहेको छ। यतिबेला कोशी प्रदेश र बागमती प्रदेशका पहाडी क्षेत्रमा एक–दुई स्थानमा हल्का वर्षा भइरहेको छ।

आज दिउँसो देशको पहाडी भूभागमा सामान्य बदली रहन सक्नेछ भने अन्य क्षेत्रहरूमा आंशिक बदली रहनेछ। मौसम पूर्वानुमान अनुसार, कोशी, बागमती, गण्डकी र कर्णाली प्रदेशका पहाडी भू-भागका थोरै स्थानमा तथा अन्य केही स्थानमा मध्यम वर्षा हुन सक्ने सम्भावना छ।

महाशाखाले आगामी २४ घण्टा भारी वर्षाको सम्भावना नरहेको प्रष्ट पारेको छ। यद्यपि, पहाडी क्षेत्रमा यात्रा गर्ने तथा वर्षासँग सम्बन्धित कार्यमा संलग्न नागरिकहरूलाई सावधानी अपनाउन सुझाव दिइएको छ।