भदौ १७,२०८२ काठमाडौं – गोरखा जिल्लामा मंगलबार बिहान भएको बस दुर्घटनामा २१ जना घाइते भएका छन्। काठमाडौंबाट गोरखाको आरुघाटतर्फ जाँदै गरेको गण्डकी प्रदेश १–००६ ख ४१३१ नम्बरको बस तान्द्राङस्थित टारिफाँटमा बिहान करिब साढे ५ बजे दुर्घटनामा परेको हो।

जिल्ला प्रहरी कार्यालय गोरखाका डिएसपी इन्द्रप्रसाद सुवेदीका अनुसार बस सडकबाट करिब चार मिटर तल खसेको थियो।दुर्घटनामा घाइते भएका मध्ये १७ जनाको आरुघाट आधारभूत अस्पतालमा उपचार भइरहेको छ भने खुट्टा फ्याक्चर र टाउकोमा गम्भीर चोट लागेका ४ जनालाई अन्यत्र रिफर गरिएको छ।

अस्पतालका मेडिकल अधिकृत डा. अमरेश कुमार मण्डलका अनुसार अस्पतालमा उपचाररत सबैको अवस्था सामान्य रहेको छ।