भदौ ६,२०८२ काठमाडौं – प्रधानमन्त्री केपी शर्मा ओलीले प्रतिनिधिसभाबाट विश्वासको मत लिनुपर्ने आदेशको माग गर्दै दायर गरिएको रिटमा आज (शुक्रबार)का लागि सर्वोच्च अदालतमा पेसी तोकिएको छ । अधिवक्ता वीरेन्द्र केसीले बिहीबार सर्वोच्च अदालतमा रिट निवेदन दर्ता गरेका थिए । उक्त रिटमा उनले प्रधानमन्त्री ओलीले संविधानअनुसार विश्वासको मत लिनुपर्ने माग गरेका छन् ।

जनता समाजवादी पार्टी, नेपालले असार ३२ गते सरकारलाई दिएको समर्थन फिर्ता लिएको घोषणा गरेको थियो । समर्थन फिर्तासँगै सरकार अल्पमतमा परेको दाबी गर्दै अधिवक्ता केसीले संवैधानिक व्यवस्था कार्यान्वयन गर्न अदालतसँग आग्रह गरेका हुन् । रिटमा प्रधानमन्त्री ओलीसँगै प्रधानमन्त्री तथा मन्त्रिपरिषद् कार्यालय, सभामुख देवराज घिमिरे, सङ्घीय संसद् सचिवालय र राष्ट्रपति कार्यालय शीतल निवासलाई विपक्षी बनाइएको छ ।