श्रावण २३,२०८२काठमाडौं– नेपाल स्टक एक्सचेञ्ज (नेप्से) ले शेयर बजारमा लगानी गर्दा फेसबुक, टिकटक, एक्स (ट्विटर) जस्ता सामाजिक सञ्जालमा आएको सुझाव वा प्रस्तावका भरमा निर्णय नगर्न लगानीकर्तालाई आग्रह गरेको छ।

नेप्सेले शुक्रबार आफ्नो आधिकारिक फेसबुक पेजमार्फत सूचना जारी गर्दै लगानीकर्तालाई विश्वसनीय र अनुमतिप्राप्त स्रोतको आधारमा मात्रै कारोबार गर्न सुझाव दिएको हो।

‘फेसबुक, टिकटक, ट्विटर लगायतका सामाजिक सञ्जालमार्फत आउने प्रस्तावका भरमा लगानी नगरौँ,’ नेप्सेले भनेको छ, ‘सेयर बजारमा कारोबार गर्दा लाइसेन्स प्राप्त सेयर ब्रोकरमार्फत मात्र गरौँ।’

नेप्सेको भनाइमा हालका दिनमा सामाजिक सञ्जालमार्फत भ्रामक जानकारी फैलाइने र त्यसको प्रभावमा केही लगानीकर्ताले हानी व्यहोर्नुपरेको पाइएको छ। यसकारण उनले सावधानी अपनाउन सबैलाई आग्रह गरेको हो।