असार २४, २०८२ काठमाडौं । भिजिट भिसा प्रकरणको विषय उठाउँदै राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले आज पनि संघीय संसद् बैठक बहिष्कार गरेका छन्। दुवै दलले गृहमन्त्री रमेश लेखकको राजीनामा माग गर्दै संसद्मा लगातार अवरोध गरिरहेका छन्।

सरकारले सो विषयमा पूर्व मुख्यसचिव शंकरदास बैरागीको संयोजकत्वमा छानबिन समिति गठन गरिसकेको छ। तर रास्वपाले उक्त समिति स्वीकार गर्न अस्वीकार गर्दै निष्पक्ष छानबिनको माग दोहोर्याइरहेको छ।

यस्तै, रास्वपाले संघीय निजामती सेवा सम्बन्धी विधेयक पारित गर्ने प्रक्रियामा भएको अनियमितताबारे पनि छुट्टै छानबिनको माग राख्दै आएको छ। विपक्षी दलहरूको लगातार बहिष्कारका कारण संसद्को कार्यसूची प्रभावित भएको छ। सत्ता पक्षले भने छानबिन समिति बनाइसकेको भन्दै संसद् सञ्चालनमा सहयोग गर्न आग्रह गर्दै आएको छ।