चैत्र २१, २०८१ बाँके : नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीका नेताहरुसहित लुम्बिनी प्राविधिक विश्वविद्यालयको अवलोकन गरेका छन् । पार्टीको जागरण अभियानका क्रममा बाँके पुगेका दाहालसहितका नेताहरूले बिहीबार विश्वविद्यालयको अवलोकन गरेका हुन् । त्यस क्रममा नेताहरूले विश्वविद्यालयको परिचय तथा अवधारणापत्र-२०८१ को छलफलमा समेत भाग लिएका छन्।

२०७९ सालमा माओवादी केन्द्रका नेता कुलप्रसाद केसी लुम्बिनी प्रदेशको मुख्यमन्त्री हुँदा लुम्बिनी प्रदेशको गौरवको आयोजनाको रूपमा लुम्बिनी प्राविधिक विश्वविद्यालय स्थापना भएको थियो । विश्वविद्यालयको समस्याको बारेमा पदाधिकारी र कर्मचारीले गुनासो गरेपछि प्रचण्डले शिक्षामन्त्री विद्या भट्टराईसँग फोनमा कुरा गर्दै कानुन बनाएर विश्वविद्यालयको समस्या समाधान गर्न आग्रह गरेका थिए ।

सो अवसरमा लुम्बिनी प्राविधिक विश्वविद्यालयका रजिष्टार रेग भण्डारीले विश्वविद्यालयको अवधारणा पत्र पेस गरेका थिए ।