भदौ ६, २०८० काठमाडौँ: राष्ट्रिय मान्यताप्राप्त दलहरूको बैठकमा सुन तस्करीबारे छानबिन गर्न उच्चस्तरीय आयोग गठन गर्ने सहमति भएको छ । सात दलका तर्फबाट गरिएको दुई बुँदे सहमतिमा गत साउन २ गते बरामद भएको ६० केजी सुन र भेपमा लुकाएर ल्याएको सुन तस्करीबारे सीआइबीको अनुसन्धान जारी राख्दै असोज ५ गते उच्चस्तरीय छानबिन आयोग गठन गर्ने उल्लेख छ ।

---

सिंहदरबारमा भएको सहमतिपछि नेपाली कांग्रेसका नेता रमेश लेखकले आगामी असोज ५ गते आयोग गठन गरेर त्यसै दिनबाट काम सुरु हुने बताए ।

---

‘आयोगलाई मुख्य तीनवटा टिओआर छन् । जसमा कानुनी र संरचनागत समस्या भए त्यसको समेत निराकरण गर्ने र पटक पटकका सुन तस्करीका घटनाको समेत छानबिन गरेर सुझाव प्रतिवेदन बुझाउने’, लेखकले भने, ‘आयोगको विस्तृत टिओआर नेपाल सरकारले तोक्छ ।’

---

एमालेका प्रमुख सचेतक पदम गिरीले आयोग कति सदस्य हुने कसको नेतृत्वमा बनाउने भन्ने कुरा दलहरुबीच छलफल गरेर टुङ्ग्याइने बताए ।