निर्वतमान शहरी विकास मन्त्री मोहम्मद इश्तियाक राईले आफ्नो कार्यकालमा कर्मचारीको उत्कृष्ट समन्वय र सहयोग प्राप्त भएको बताउनु भएको छ । सिहदरवार स्थित शहरी विकास मन्त्रालयमा बुधवार आयोजित बिदाई समारोहमा मन्त्री राईले सवै कर्मचारी र सरोकारवाला निकायको समन्वय र सहकार्यले बिकासे मन्त्रालयमा शहरी बिकास मन्त्रालयले प्रभावकारी कार्य सम्पादन गर्न सकेको उल्लेख गर्नुभयो ।

राईको नेतृत्वमा मन्त्रालयले पछिल्लो एक बर्षमा आफ्नो जिम्मेवारी अन्र्तगत ६० प्रतिशत उपलव्धी हासिल गरेको छ । उहाँले आफ्नो कार्यकालमा कार्यसम्पदान राम्रो हुनुमा कार्यालय सहयोगीको समेत महत्वपुर्ण भूमिका रहेको बताउनुभयो । राईले मन्त्रालयको १९ महिना लामो कार्यकालमा साथ र सहयोग गर्ने सम्पुर्ण कर्मचारी, सरोकारवाला निकाय, संचार जगत लगायतलाई धन्यवाद दिनुभयो ।

अहिलेसम्म राजीनामा दिएर जाने मन्त्रीहरुलाई सम्मान गरि बिदाई गर्ने प्रचलन कम रहेको भन्दै मन्त्रालयमा कर्मचारीको सम्मान र माया पाउँदा आफैलाई भाग्यमानी महसुस भएको उल्लेख गर्नुभयो ।  राईले भन्नुभयो , ‘तपाईहरुको यो सम्मान र मायाले निकै भाबुक बनायो, पार्टी राजनीतिमा सरकारमा बस्ने र छा्ड्ने कुरा सामान्य हो, त्यसैले प्रतिनिधी सभा सदस्य र नागरिकको हैसियतबाट मन्त्रालयमा आफुले कुनै सहयोग गर्ने अवस्था आए सधै तयार रहने छु।’

राईले प्रधानमन्त्रीबाट आफ्नो कार्यसम्पादनको प्रशंसा भएको भन्दै यसमा आफ्नो व्यक्तिगत भन्दा पनि कर्मचारी साथीहरुको सहयोग र सहकार्य मुख्यकारण रहेको बताउनुभयो । फरक परिवेश श्रृजना भएर आफुहरु सरकारबाट बाहिरिए पनि सदैब मुलुकको हित र सम्बृद्धिका लागि आफुले कामगर्ने राईले प्रतिबद्धता जनाउनुभयो । निर्वतमान मन्त्री राईले आगामी दिनमा अझै प्रभावकारी रुपमा राज्यमन्त्री र सचिवज्यूबाट मन्त्रालयको काम कारवाही अघि बढ्नेमा बिश्वास व्यक्त गर्नुभयो ।