काठमाडौंका सार्वजनिक स्थलमा भइरहेको निःशुल्क खाना वितरण बन्द गरिने भएको छ । महानगरपालिका र निःशुल्क खाना खुवाउने अभियान सञ्चालन गरिरहेका संघसंस्थाहरूले सम्भावित जोखिमलाई ध्यानमा राख्दै खुला ठाउँबाट खाना वितरण गर्न बन्द गर्ने र महानगरकै समन्वयमा व्यवस्थित रूपले खाना खुवाउने भएका छन् ।

महानगरमा शुक्रबार भएको छलफलले मंसिर १ गतेसम्म हाल सञ्चालन भएकै जसरी खाना वितरण गर्ने र मंसिर २ गतेबाट खुला ठाउँको वितरणलाई रोक्ने निष्कर्ष निकालेको हो ।

लकडाउनपछि खुलामञ्चमा भोजन सेवा सञ्चालन गरिरहँदा कोभिड– १९ को संक्रमण झन बढ्न सक्ने, स्वास्थ्यबर्द्धक वातावरण कायम नहुने र सामाजिक प्रतिष्ठामा समेत आँच आउन सक्ने कुरालाई मध्यनजर गर्दै महानगर र भोजन सेवा गराउँदै आएका संघसंथाले खाना खुवाउने वैकल्पिक स्थानको खोजी गर्ने सहमति गरेका हुन् ।