काठमाडौं, प्रधानमन्त्री एवं नेकपाका एक अध्यक्ष केपी शर्मा ओलीको बुधवार दोस्रो पटक मिर्गौला प्रत्यारोपण गर्न लागिएको उहाँको दलका प्रवक्ताले बताउनु भएको छ । आइतवार बसेको पार्टी सचिवालय बैठकमा अध्यक्ष ओलीले यसबारे जानकारी गराएको नेकपाका प्रवक्ता नारायणकाजी श्रेष्ठले बताउनुभयो ।

प्रत्यारोपणका लागि सोमवार नै प्रधानमन्त्री ओली शिक्षण अस्पताल महाराजगञ्जमा भर्ना हुने श्रेष्ठले बताउनुभयो । प्रधानमन्त्री ओलीलाई उहाँकै नाता पर्ने एक महिलाबाट मिर्गौला प्रत्यारोपण गर्न लागिएको सचिवालयका एक नेताले बताउनु भयो ।

यसअघि २०६४ सालमा प्रधानमन्त्री ओलीको भारतको दिल्लीस्थित एपोलो अस्पतालमा मिर्गौला प्रत्यारोपण भएको थियो। त्यसयता उहाँले नियमित रूपमा स्वस्थ्य परीक्षण गराउँदै आउनु भएको छ । उहाँलाई बुहारी अन्जना घिमिरेले मिर्गौला दिनु भएको थियो ।