१३ साउन २०८३ काठमाडौं – राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा सुनसरी घटनालगायत समसामयिक विषयमा छलफल गर्न आज सर्वदलीय बैठक बस्ने भएको छ।

रास्वपाका महामन्त्री विपिन आचार्यका अनुसार बैठक बिहान ८ बजे सिंहदरबारमा बस्नेछ। छलफलमा संघीय संसद्मा प्रतिनिधित्व गर्ने सबै राजनीतिक दलसँगै उपेन्द्र यादव, महन्थ ठाकुर र सीके राउत नेतृत्वका दललाई पनि आमन्त्रण गरिएको छ।

रास्वपाले सबै दललाई औपचारिक पत्राचार गर्नुका साथै सभापति लामिछानेले प्रमुख नेताहरूलाई टेलिफोनमार्फत पनि बैठकमा सहभागी हुन आग्रह गरेको जनाएको छ। सुनसरी घटनापछि उत्पन्न असहज परिस्थितिमा सामाजिक सद्भाव कायम राख्न, द्वेष फैलिन नदिन र शान्ति–सुरक्षाको पक्षमा राजनीतिक तहबाट साझा सन्देश तथा अपिल जारी गर्ने उद्देश्यले सर्वदलीय छलफल आयोजना गरिएको रास्वपाले जनाएको छ।