२० असार २०८३ काठमाडौं – देशभर मनसुनी वायुको प्रभाव कायम रहेकाले आज विभिन्न स्थानमा वर्षाको सम्भावना रहेको छ। जल तथा मौसम विज्ञान विभागका अनुसार हाल कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशमा सामान्यदेखि पूर्ण बदली रहेको छ भने मधेस प्रदेशमा आंशिक बदली छ।

बागमती र लुम्बिनीका केही तथा कोशी, गण्डकी, कर्णाली र सुदूरपश्चिमका एक–दुई स्थानमा चट्याङसहित हल्कादेखि मध्यम वर्षा भइरहेको छ।

आज दिउँसो हिमाली तथा पहाडी भूभागका विभिन्न स्थानमा र तराईका केही क्षेत्रमा चट्याङसहित मध्यम वर्षाको सम्भावना रहेको विभागले जनाएको छ। लुम्बिनी र सुदूरपश्चिमका तराई क्षेत्र तथा मधेससहित कोशी, बागमती र गण्डकीका केही तराई क्षेत्रमा पनि वर्षा हुन सक्ने अनुमान छ।

आज राति गण्डकी, लुम्बिनी, कर्णाली र सुदूरपश्चिम प्रदेशका धेरै स्थानमा चट्याङसहित मध्यम वर्षा हुने सम्भावना रहेको छ। साथै, यी चारै प्रदेशका पहाडी तथा तराईका एक–दुई स्थानमा भारी वर्षाको सम्भावना रहेकाले सतर्कता अपनाउन मौसमविद्ले आग्रह गरेका छन्।