९ असार २०८३ काठमाडौं – फिफा विश्वकप २०२६ अन्तर्गत जारी खेलमा नवप्रवेशी जोर्डनले अल्जेरियाविरुद्ध अग्रता बनाएको छ।अमेरिकाको सान फ्रान्सिस्कोस्थित बे एरेना स्टेडियममा भइरहेको समूह चरणको खेलमा जोर्डनले ३६औँ मिनेटमा गोल गर्दै १–० को अग्रता लिएको हो। जोर्डनका लागि निजार अल रशदानले गोल गरेका हुन्।

खेलको सुरुआती समयदेखि नै आक्रामक देखिएको जोर्डनले अवसरलाई सदुपयोग गर्दै पहिलो हाफमै अग्रता बनाउन सफल भएको हो। दुवै टोली यसअघि विश्वकपको आफ्नो पहिलो खेलमा पराजित भएका थिए। त्यसैले दोस्रो खेलमा पहिलो जितको खोजीमा रहेका जोर्डन र अल्जेरियाबीच प्रतिस्पर्धात्मक खेल भइरहेको छ।

जोर्डनले अग्रता जोगाउन सके विश्वकप इतिहासमा आफ्नो पहिलो जित दर्ता गर्ने सम्भावना बलियो बन्नेछ भने अल्जेरिया खेलमा फर्किने प्रयासमा छ।