काठमाडौं । सरकारले २५ वटा अत्यावश्यक सेवामा हडताल गर्न नपाइने व्यवस्था गर्दै नेपाल राजपत्रमा सूचना प्रकाशित गरेको छ। आवश्यक सेवा सञ्चालन ऐन, २०१४ को दफा ३ को उपदफा (१) ले दिएको अधिकार प्रयोग गर्दै सरकारले उक्त निर्णय सार्वजनिक गरेको हो।

सूचनाअनुसार डाँक, तार तथा टेलिफोन सेवा, जल, स्थल र हवाई यातायात, सरकारी तथा सुरक्षा मुद्रण सेवा, सञ्चार सेवा, खानेपानी, पेट्रोलियम पदार्थको आपूर्ति, अस्पताल तथा स्वास्थ्य सेवा, औषधि उत्पादन र वितरण, फोहोरमैला व्यवस्थापन, बैंक तथा बीमा सेवा, विद्युत् आपूर्ति, दैनिक उपभोग्य वस्तुको आपूर्ति तथा राहदानी सेवासहित २५ अत्यावश्यक क्षेत्रमा हडताल गर्न निषेध गरिएको छ।

सरकारले सर्वसाधारणको दैनिक जीवन र सार्वजनिक सेवामा असर नपरोस् भन्ने उद्देश्यले यस्तो व्यवस्था लागू गरिएको जनाएको छ।