असोज २८,२०८२ काठमाडौं– काठमाडौं महानगरपालिकाले विपन्न, असहाय र वेवारिसे व्यक्तिहरूको नि:शुल्क उपचारलाई प्रभावकारी बनाउन वीर अस्पतालमा सहजीकरण कक्ष स्थापना गर्ने भएको छ। यसका लागि महानगर स्वास्थ्य विभाग प्रमुख दिपक के.सी. र वीर अस्पतालका निर्देशक डा. दलीप शर्माबीच सम्झौता भएको छ।

कक्षमा करारमा ३ जना नर्सिङ जनशक्ति राखिनेछ, जसको पारिश्रमिक महानगरले व्यहोर्नेछ। यो कक्षमार्फत “freehealth.kathmandu.gov.np” प्रणाली प्रयोग गरी लक्षित वर्गका बिरामीलाई विभिन्न अस्पतालमा उपचारका लागि समन्वय गरिनेछ।

महानगरको फ्री हेल्थ सेवाअन्तर्गत हालसम्म सयौं बिरामीले अपरेसन तथा दीर्घ रोगको सेवा लिइसकेका छन्। हाल ५३ निजी अस्पतालका ३८० शय्या यस सेवामा आवद्ध छन्।