काठमाडौं । यो वर्षको मनसुन असाधारण रूपमा छिटो नेपाल प्रवेश गरेको छ। मौसम पूर्वानुमान महाशाखाका अनुसार, गएरातिदेखि मनसुन पूर्वी नेपाल हुँदै प्रवेश गरिसकेको छ र कोसी प्रदेशका अधिकांश भूभागमा विस्तार भइसकेको छ।

मनसुनसँगै कोसीका विभिन्न क्षेत्रमा मनसुनी वर्षा सुरु भइसकेको छ। महाशाखाले जनाएको अनुसार, नेपालमा मनसुन प्रवेश गर्ने औसत मिति जुन १३ हो। तर यसवर्ष सो सरदर मितिभन्दा १५ दिन अगावै मनसुन भित्रिएको छ, जुन हालसम्मकै सबैभन्दा छिटो मानिएको छ।

यद्यपि, देशका अन्य भागहरूमा भने मनसुन विस्तार हुन केही दिन लाग्ने मौसमविद्हरूले बताएका छन्। आगामी दिनहरूमा देशभर मनसुनी प्रभाव फैलने अपेक्षा गरिएको छ।