२६ वैशाख २०८०, काठमाडौँ : नेपाली कांग्रेसका सांसद प्रदीप पौडेलले काठमाडौंका अधिकांश सडक अलपत्र रहेको बताएका छन्। बिजुलीका तार भूमिगत गर्ने र खानेपानीका पाइप बिच्छाउने नाममा सडक बारम्बार भत्काउने परेको बताए ।

प्रतिनिधि सभाको बैठकमा बोल्दै सांसद पौडेलले ‘काठमाडौंकै धेरैजसो सडक अलपत्र छ। खानेपानीका पाइप बिच्छाउने र बिजुलीका तार भूमिगत गर्ने नाममा सडक भत्काइएको छ।’उनले वर्खाअघि नै ती सडक मर्मत गरिसक्न सरकारलाई अनुरोध गरेका छन्।

‘सरकारका मन्त्रालयहरूबीच समन्वय नहुँदा एकै सडक वर्षमा ४ पटकसम्म भत्काइएको छ। सरकारको काम सडक भत्काउने मात्र हो?,’ उनले प्रश्न गरे। स्थानीय र प्रदेश सरकारसँग केन्द्र सरकारले समन्वय गरी सडक मर्मत गर्नुपर्ने पनि उनले बताए।