१७ असोज, २०७८ एजेन्सी : पेरिस सेन्ट जर्मेन लिग वानमा रेनसँग स्तब्ध बनेको छ । स्टार खेलाडीहरूको भरिपूर्ण टोली आइतबार भएको खेलमा २–० ले पराजित भएको हो । खेल अवधिभर पीएसजीले गोलका लागि १० वटा प्रहार गरे पनि एउटै पनि प्रहार लक्ष्यमा पुग्न सकेन ।

पहिलो हाफको अन्त्यतिर गाइटान लाबोड्रेले गोल गर्दै रेनलाई अग्रता दिलाएका थिए । दोस्रो हाफको सुरुवातमा नै फ्लाभियन टेट अर्को गोल थप्दै रेनको अग्रता दोब्बर बनाए । खेलको ८२ मिनेटमा रेनले पेनाल्टी पनि पाएको थियो । तर, भिडियो एसिस्ट रेफ्रीले उक्त निर्णयलाई उल्टाएको थियो ।

निरस खेल प्रदर्शन गरेको पीएसजीले गोलका लागि थुप्रै प्रयास गरे पनि रेनका गोलकिपरलाई परीक्षण नै गर्न सकेन । पीएसजीले यो सिजन लिगमा पहिलोपटक हार बेहोरेको हो । पराजयका बाबजुद ९ खेलपछि पीएसजी २४ अङ्क बटुल्दै लिगको शीर्ष स्थानमा कायम रहेको छ ।