१४ साउन २०८३ काठमाडौं – नेपाली कांग्रेसका सांसद अर्जुननरसिंह केसीले प्रधानमन्त्री बालेन्द्र शाहले संसद्लाई उपेक्षा गरेको आरोप लगाएका छन्। बिहीबार प्रतिनिधिसभाको बैठकमा बोल्दै उनले प्रधानमन्त्री सात दिनमा जम्मा दुईदेखि तीन घण्टामात्र संसद्मा उपस्थित भएको दाबी गर्दै यसले संसदीय अभ्यासको अवमूल्यन गरेको बताए।

केसीले संसद्मा उठेका प्रश्नको जवाफ दिनुको सट्टा सरकार सामाजिक सञ्जालमार्फत सञ्चालित भएको जस्तो देखिएको टिप्पणी गर्दै प्रधानमन्त्रीले संसद्प्रति जिम्मेवार हुनुपर्ने बताए।

उनले कप्तानगञ्ज गोलीकाण्ड, बढ्दो आत्महत्या तथा आत्मदाहका घटना, सुकुम्बासी र लघुवित्त पीडितको समस्या, महँगी र आर्थिक मन्दीका कारण जनजीवन कष्टकर बन्दै गएको उल्लेख गर्दै सरकार नागरिकका समस्या समाधानमा गम्भीर हुनुपर्ने धारणा राखे।