१३ साउन २०८३ काठमाडौं – कर्णाली प्रदेशका नवनियुक्त मुख्यमन्त्री मंगलबहादुर शाहीले बुधबार पद तथा गोपनीयताको शपथ लिएका छन्। वीरेन्द्रनगरस्थित प्रदेश प्रमुखको कार्यालयमा आयोजित समारोहमा प्रदेश प्रमुख यज्ञराज जोशीले उनलाई शपथ गराएका हुन्।

नेपाली कम्युनिस्ट पार्टी (नेकपा) संसदीय दलका नेता शाही मंगलबार संविधानको धारा १६८ को उपधारा (२) बमोजिम प्रदेशको पाँचौं मुख्यमन्त्रीमा नियुक्त भएका थिए।

४० सदस्यीय कर्णाली प्रदेशसभामा सरकार गठनका लागि २१ सांसदको समर्थन आवश्यक पर्दछ। नेकपा र एमालेसँग संयुक्त रूपमा २४ सांसदको समर्थन रहेको छ। साउन ९ गते नेकपा संयोजक पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीबीच भएको सत्ता साझेदारी सहमतिअनुसार कर्णाली सरकारको नेतृत्व नेकपाले पाएको हो। सोही सहमतिका आधारमा शाही मुख्यमन्त्री नियुक्त भएका हुन्।