२९ बैशाख २०८३ काठमाडौं- ज्ञानेन्द्र शाहीले सरकार र प्रधानमन्त्रीमाथि कडा प्रश्न उठाउँदै राज्यको असंवेदनशीलताका कारण नागरिकको आत्मसम्मानपूर्वक बाँच्ने अधिकार खोसिएको आरोप लगाएका छन् । राष्ट्रिय प्रजातन्त्र पार्टी संसदीय दलका नेता शाहीले प्रतिनिधिसभा बैठकमा बोल्दै सरकारले मानवीय संवेदनालाई बेवास्ता गरेको टिप्पणी गरे ।

उनले “राज्य जहिले पनि शक्तिशालीको पक्षमा उभिने होइन” भन्दै सुत्केरी महिलाको घर भत्काइएको प्रसंग उठाउँदै यस्तो कार्यले मानवीय पीडा बढाएको बताए ।

शाहीले अव्यवस्थित बस्ती हटाउने नाममा डोजर चलाइए पनि मानवीय संवेदनामा प्रहार गर्नु गलत भएको स्पष्ट पारे । “विकासको नाममा मानवीय संवेदनामाथि डोजर चलाएर देश बन्न सक्दैन,” उनले भने ।

साथै, उनले सरकारका मन्त्रीहरूकै आवास सम्बन्धी विषयमा पनि प्रश्न उठाउँदै छानबिनको माग गरेका छन् ।