५ चैत,२०८२ काठमाडौं- गत फागुन २१ गते सम्पन्न प्रतिनिधिसभा सदस्य निर्वाचनअन्तर्गत समानुपातिकतर्फ निर्वाचित ११० सांसदलाई आज प्रमाणपत्र प्रदान गर्न सुरु गरिएको छ। निर्वाचन आयोगमा आयोजित कार्यक्रममा विभिन्न ६ दलबाट समानुपातिक प्रणालीमार्फत निर्वाचित सांसदलाई प्रमाणपत्र वितरण भइरहेको छ।

आयोगले सोमबार ११० सांसदको सूची सार्वजनिक गरेको थियो। सूचीअनुसार राष्ट्रिय स्वतन्त्र पार्टी (रास्वपा)का ५७, नेपाली कांग्रेसका २०, नेकपा एमालेका १६, नेपाली कम्युनिष्ट पार्टीका ९, तथा श्रम संस्कृति पार्टी र राष्ट्रिय प्रजातन्त्र पार्टी (राप्रपा)बाट चार/चार जना सांसद निर्वाचित भएका छन्।

सांसदहरूलाई प्रमाणपत्र वितरण भएसँगै आयोगले प्रतिनिधिसभा सदस्य निर्वाचन, २०८२ को समग्र निर्वाचन परिणामसहितको प्रतिवेदन राष्ट्रपति रामचन्द्र पौडेलसमक्ष आजै बुझाउने तयारी गरेको छ।