खोटाङ — जिल्लाको केपिलासगढी गाउँपालिका–२ खार्ताम्छाको बालाबेसी क्षेत्रमा हेलिकोप्टर दुर्घटनामा परेको छ। काठमाडौंबाट ६ जना यात्रु बोकेर गएको उक्त हेलिकोप्टर बारीमा अवतरण गर्ने क्रममा दुर्घटनामा परेको जनाइएको छ।

प्रमुख जिल्ला अधिकारी रेखा कँडेलका अनुसार दुर्घटनामा मानवीय क्षति नभएको प्रारम्भिक जानकारी प्राप्त भएको छ। यसअघि हेलिकोप्टरले शव बोकेको भन्ने सूचना आए पनि वडाध्यक्ष मिलनकुमार राईले हेलिकोप्टरमा कुनै शव नरहेको स्पष्ट पारेका छन्।

गाउँपालिका अध्यक्ष समिर राईका अनुसार बारीको डिलमा अवतरण गर्ने क्रममा समस्या उत्पन्न भएपछि हेलिकोप्टरलाई पुनः उडाएर बारीको बीचतिर लैजान खोज्दा दुर्घटना भएको हो।

घटनाबारे विस्तृत विवरण आउन बाँकी रहेको छ भने सम्बन्धित निकायले थप अनुसन्धान अघि बढाएको जनाएको छ।