काठमाडौं । निर्वाचन आयोग ले फागुन २१ गते हुने प्रतिनिधि सभा सदस्य निर्वाचनका लागि राजनीतिक दल तथा उम्मेदवारको प्रचारप्रसारमा अवरोध पुर्‍याउने जो–कोहीविरुद्ध कडा कारबाही गरिने चेतावनी दिएको छ।

आयोगका अनुसार निर्वाचन आचारसंहिता, २०८२ तथा निर्वाचन (कसुर तथा सजाय) ऐन, २०७३ बमोजिम कुनै पनि दल, उम्मेदवार वा भातृ संगठनले आयोजना गरेको जुलुस, बैठक, कोणसभा वा अन्य कार्यक्रममा बाधा पुर्‍याउन पाइँदैन।

उक्त व्यवस्था उल्लंघन गरेमा दुई लाख रुपैयाँसम्म जरिवाना, तीन वर्षसम्म कैद वा दुवै सजाय हुन सक्ने कानुनी प्रावधान रहेको आयोगले स्पष्ट पारेको छ।

आयोगले सबै राजनीतिक दल, उम्मेदवार, सरोकारवाला तथा आम नागरिकलाई स्वतन्त्र, निष्पक्ष र भयमुक्त वातावरणमा निर्वाचन प्रचारप्रसार सम्पन्न गर्न सहयोग गर्न आग्रह गरेको छ।