२९ पुस,२०८२ काठमाडौं – जल तथा मौसम विज्ञान विभागले देशभर पश्चिमी वायुको आंशिक प्रभाव रहेको जनाएको छ । विभागका अनुसार हाल मधेश, बागमती र लुम्बिनी प्रदेशमा आंशिक बदली रही बाँकी पहाडी तथा हिमाली भू–भागमा मौसम मुख्यतया सफा रहेको छ । तराईका थोरै स्थानहरूमा हुस्सु लागेको अवस्था छ ।

आज दिउँसो तथा राति तराई भू–भागका केही स्थानहरूमा हुस्सु र कुहिरो रहने अनुमान गरिएको छ । यस्तै, कर्णाली र सुदूरपश्चिम प्रदेशका उच्च पहाडी तथा हिमाली भू–भागमा आंशिक बदली रहने तथा बाँकी भू–भागमा मौसम मुख्यतया सफा रहने विभागले जनाएको छ ।

मौसमको अवस्थालाई ध्यानमा राख्दै विशेषगरी बिहान र रातिको समयमा सवारी तथा हवाई यातायातमा सतर्कता अपनाउन विभागले आग्रह गरेको छ ।