मंसिर २४, २०८२ काठमाडौं— स्वास्थ्य तथा जनसंख्या मन्त्रालयले आजदेखि सिंहदरबारबाट सेवा प्रवाह पुनः सुरु गरेको छ। मन्त्रालयले सूचना जारी गर्दै रामशाहपथस्थित नेपाल स्वास्थ्य अनुसन्धान परिषद्को भवनबाट सञ्चालित मूलभूत सेवाहरू मङ्सिर २३ गतेदेखि सिंहदरबारमा सारेर सञ्चालन गरिएको जनाएको छ।

सूचनामा मन्त्रालयले केही महाशाखा, शाखा र एकाइका सेवाहरू भने अहिले पनि साबिककै स्थान—रामशाहपथ—बाट नै निरन्तर प्रवाह भइरहेको र छिट्टै ती सबै सेवाहरू पनि आवश्यक व्यवस्थापछि सिंहदरबारमै एकीकृत रूपमा सञ्चालन हुने जानकारी दिएको छ।

रामशाहपथस्थित मन्त्रालयको भवनमा भदौ २४ गते जेनजी आन्दोलनका क्रममा आगजनी भएपछि मन्त्रालयको सेवा अस्थायी रूपमा स्वास्थ्य अनुसन्धान परिषद्को भवनबाट प्रवाह हुँदै आएको थियो। अब चरणबद्ध रूपमा सबै काम सिंहदरबारमै केन्द्रित गरिने मन्त्रालयले जनाएको छ।