असोज २३, २०८२ काठमाडौं–  नेपाली कांग्रेसको पदाधिकारी बैठक आज ललितपुरको कुपण्डोलस्थित एक होटलमा बस्दै छ। दिउँसो १ बजे बोलाइएको बैठकमा पार्टी सभापति शेरबहादुर देउवा भने सहभागी नहुने भएका छन्।

मुख्य सचिव कृष्ण प्रसाद पौडेलले स्वास्थ्यका कारण देउवा बैठकमा नजाने जानकारी दिएका छन्। यद्यपि सभापति देउवाका स्वकीय सचिव भानु देउवाले भने यो अनौपचारिक बैठक भएकाले मात्र देउवा सहभागी नहुने स्पष्ट पारेका छन्।

सभापति देउवा अनुपस्थित रहने भएपछि उपसभापति पूर्णबहादुर खड्काले बैठकको अध्यक्षता गर्ने भएका छन्। बैठकमा २६ असोजमा बस्ने केन्द्रीय समिति बैठकका एजेन्डा, महाधिवेशनको तयारी, र निर्वाचनसम्बन्धी विषयहरूमा छलफल हुने बताइएको छ।

यसअघि पनि कांग्रेस पदाधिकारीबीच आन्तरिक छलफलहरू भइरहेका छन्। आजको अनौपचारिक बैठकलाई पनि त्यसैको निरन्तरता मानिएको छ।