असोज २०, २०८२ काठमाडौं-  इलाममा अविरल वर्षासँगै आएको बाढी र पहिरोले जिल्लास्थित १३ वटा जलविद्युत् आयोजना बन्द भएका छन्। ती आयोजना बन्द हुँदा कुल १०५.४ मेगावाट विद्युत् उत्पादन तत्कालका लागि पूर्णरूपमा ठप्प भएको छ।

ऊर्जा, जलस्रोत तथा सिंचाई मन्त्रालयका अनुसार प्रभावित आयोजनाहरूमा ४.५ मेगावाटको माइखोला हाइड्रोपावर, ८ मेगावाटको माइखोला क्यासकेड, २२ मेगावाटको माइखोला, जोगमाइखोला, तल्लो जोगमाई माइवेनी लगायतका परियोजना छन्।

यस्तै, पाँचथर, इलाम र सिन्धुपाल्चोक जिल्लामा निर्माणाधीन रहेका जलविद्युत् आयोजनाहरू पनि गम्भीर रूपमा प्रभावित भएका छन्। मन्त्रालयका अनुसार निर्माणाधीन ५ मध्ये ४ आयोजना डिले हुनेछन्।

स्वतन्त्र ऊर्जा उत्पादकहरूको संस्था नेपाल ले पनि १३ आयोजना बन्द भई १०५.४ मेगावाट विद्युत् उत्पादन रोकिएको पुष्टि गरेको छ। साथै, निर्माणाधीन अवस्थामा रहेका ५ जलविद्युत् आयोजना (कुल ९३ मेगावाट क्षमता) मा पनि बाढी र पहिरोले क्षति पुर्‍याएको जनाइएको छ।

ऊर्जा मन्त्रालय र इप्पानले संयुक्त रूपमा क्षतिको मूल्याङ्कन सुरू गरेका छन्। यस अवस्थाले निकट भविष्यमा राष्ट्रिय प्रसारण प्रणालीमा विद्युत् आपूर्ति घट्ने, तथा केही क्षेत्रमा लोड व्यवस्थापनको चुनौती आउन सक्ने अनुमान गरिएको छ।