माघ ६, २०८० पोखरा : चौथो संस्करणको टाइगर कप भलिबलमा हेल्प नेपाल स्पोर्ट्स क्लब च्याम्पियन बनेको छ। शनिबार भएको फाइनल खेलमा घरेलु टोली गण्डकीलाई पराजित गर्दै हेल्प नेपाल च्याम्पियन बनेको हो ।

साविकको विजेता गण्डकी ३–१ को सेटमा पराजित हुँदै तेस्रो पटक उपाधि विजेता हुनबाट रोकियो। घरेलु दर्शकको भरपुर साथ पाएको गण्डकीको सुरुवाती प्रदर्शन नै खराब भयो ।

गण्डकीलाई हेल्प नेपालले पहिलो सेटमा २५–१३ र दोस्रो सेटमा २५–१८ ले पराजित गर्न सफल भयो। तेस्रो सेटमा २३–२५ ले पछि परेको हेल्प नेपालले चौथो सेटमा २५–१७ ले जित निकाल्दै उपाधि रक्षा गर्न सफल भयो । उपाधिसँगै हेल्प नेपालले ५ लाख ५५ हजार ५५५ रूपैयाँ प्राप्त गरेको छ। उपविजेता गण्डकीले २ लाख ५५ हजार ५५५ रुपैयाँमा चित्त बुझायो ।

टाइगर ग्रुप अफ पोखरा नेपालले आयोजना गरेको प्रतियोगितामा गण्डकीले तीन जना भारतीय खेलाडी टिममा समावेश गर्दा हेल्प नेपाल पनि तीन जना पाकिस्तानी खेलाडी समावेश गरेर मैदान उत्रिएको थियो ।

शुक्रबार भएको सेमिफाइनलमा गण्डकीले सशस्त्र प्रहरी बलको एपिएफ क्लब र हेल्प नेपालले पाहुना टोलि श्रीलंकन आर्मीलाई पराजित गर्दै फाइनल यात्रा सुरक्षित गरेका हुन् ।