६ मंसिर २०७९, काठमाडौँ: कतारमा जारी फिफा विश्वकप फुटबलको आज तेस्रो दिन चार खेल हुँदैछ । आजदेखि हरेक दिन समूह चरणका चार खेल हुनेछन् । आज भने समूह सी र समूह डी का दुई दुई खेल गरी चार खेल हुनेछ ।

समूह सी मा रहेका अर्जेन्टिना र साउदी अरेबियाबीच आज दिउँसो लुसेल रंगशालामा पौने ४ बजे पहिलो खेल हुने भएको छ ।

दोस्रो खेलमा समूह डी मा रहेका डेनमार्क र ट्युनिसिया भिड्नेछन् । यो खेल एजुकेसन सिटी रंगशालामा साँझ पौने ७ बजे सुरु हुनेछ भने समूह सी कै अर्को तेस्रो खेल राति पौने १० बजे मेक्सिको र पोल्याण्ड भिड्नेछन् । यो खेल ९७४ वटा कन्टेनर प्रयोग गरेर बनाइएको अस्थायी रंगशाला ९७४ स्टेडियममा हुनेछ ।

यसैगरी चौथो खेलमा समूह डी मा रहेको साविक विजेता फ्रान्सले अष्ट्रेलियासँग खेल्दैछ । यो खेल मध्यराति पौने १ बजे अल जानोब रंगशालामा सुरु हुने तालिका रहेको छ ।