१२ फागुन २०७८, एजेन्सी : लिभरपुलले शीर्ष स्थानमा रहेको म्यानचेस्टर सिटीसँग ३ अंकमा घटाएको छ । बुधबार राति लिड्समाथि ६-० को शानदार जीत हासिल गर्दै लिभरपुलले सिटीमाथि दबाब कायम राखेको हो । लिभरपुलले पहिलो हाफको २० मिनेटको अन्तरमा ३ गोल गरेको थियो ।

यसमध्ये दुईवटा गोल मोहमद शलाहले पेनाल्टीमार्फत गरेका थिए । उनले नै ३० औँ मिनेटमा जो म्याटिपका लागि अर्को गोलको अवसर सिर्जना गरे । साडियो मानेले दोस्रो हाफमा दुई गोल थपे भने इन्जुरी समयमा भर्जिल भान डाइकले एक गोल गरे । २६ खेलपछि लिभरपुललको ६० अंक रहेको छ भने सिटीको ६३ अंक रहेको छ । सिटीभन्दा लिभरपुलको गोलअन्तर बढी रहेको छ ।

दुई टोली ९ अप्रिलमा इतिहाद स्टेडियममा आमने सामने हुनेछन् । बुधबार नै भएको खेलमा टोटनहम हटस्पर्स बर्नलीसँग १-० गोलले स्तब्ध बन्यो भने क्रिस्टल प्यालेसले वाटफोर्डलाई ४-१ गोलले हरायो ।