काठमाडौं, राष्ट्रपति विद्यादेवी भण्डारीले संघीय–संसद्को दुवै सदनको बैठकबाट पारित भई प्रमाणीकरणका लागि पेश हुन आएका तीनवटा विधेयक प्रमाणीकरण गर्नुभएको छ ।

प्रमाणीकरण भएका विधेयकमा शिक्षासम्बन्धी केही नेपाल ऐन संशोधन गर्न बनेको विधेयक, खेलकुद विकाससम्बन्धी कानूनलाई संशोधन र एकीकरण गर्न बनेको विधेयक र रेडियोधर्मी पदार्थको उपयोग तथा नियमन सम्बन्धमा व्यवस्था गर्न बनेको विधेयक छन् ।

राष्ट्रपतिबाट यी विधेयकहरू नेपालको संविधानको धारा ११३ को उपधारा (२) बमोजिम प्रमाणीकरण गर्नुभएको जानकारी राष्ट्रपति कार्यालयका प्रवक्ता हरिप्रसाद दाहालले दिनुभयो ।

राष्ट्रपतिले विधेयक प्रमाणीकरण गर्नुभएपछि ती विधेयक ऐन बनेका छन् र कार्यान्वयनमा आएका छन् ।