स्याङजा, भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले जनतामा भ्रम छरेर निरासा पैदा गर्न केही व्यक्तिहरु लागिपरेको बताउनुभएको छ । मन्त्री अर्यालले सरकारले जनताको हितमा काम गरेपनि केही नगरेजस्तो अनर्गल प्रचार गरेर जनतालाई भ्रममा पार्ने कोशिस भइरहेको बताउनुभएको हो ।

आइतबार स्याङ्जाको भीरकोटमा उद्योग वाणिज्य संघले आयोजना गरेको दोस्रो भीरकोट महोत्सवको समापन समारोहलाई सम्बोधन गर्नुहुँदै मन्त्री अर्यालले सबै राजनैतिक दल मिलेर जनतालाई आशाको सन्देश प्रवाह गर्नुपर्नेमा जोड दिदै भन्नुभयो, ‘जनतामा गलत सन्देश फैलाउँदा मुलुक दुर्घटनामा पर्न सक्छ, त्यसैले जनतालाई निरासा बनाउने होइन कि, उत्साहको सन्देश दिनुपर्छ’

दोस्रो भीरकोट महोत्सवले स्याङजाको आर्थिक गतिविधिसँगै पर्यटनको विकासमा टेवा पुग्ने मन्त्री अर्यालको भनाइ छ ।