काठमाडौं । मंसिरमा नेपालमै आयोजना हुन लागेको १३औं दक्षिण एसियाली खेलकुद (साग) खेल्ने तयारीमा रहेको नेपाली महिला फुटबल टोलीले किर्गिस्तानमा हुने नादेझ्दा कप खेल्ने भएको छ ।

अखिल नेपाल फुटबल संघ (एन्फा)ले मंगलबार विज्ञप्ति जारी गर्दै उक्त कप खेल्ने पुष्टि गरेको छ । नादेझ्दा कप किर्गिस्तानमा सेप्टेम्बर ६ बाट १३ सम्म आयोजना हुँदै छ । कपमा चार टोलीको सहभागिता रहनेछ । जसमा आयोजक किर्गिस्तानसँगै नेपाल, उज्वेकिस्तान र ताजिकिस्तानको सहभागिता रहनेछ । नेपालले सेप्टेम्बर ८ मा किर्गिस्तानसँग खेल्दै प्रतियोगिताको सुरुवात गर्नेछ । त्यसपछि नेपालले ९ सेप्टेम्बरमा उज्वेकिस्तान तथा १० सेप्टेम्बरमा ताजिकिस्तानसँग खेल्नेछ ।