दार्चुला । नौगढ गाउँपालिकास्थित गणेश विनायक माध्यमिक विद्यालयमा जिर्ण रहेको सेफ्टीट्यांकी भासिँदा त्यस माथी खेलिरहेका चार बालबालिकाको मृत्यु भएको छ ।

बाल कक्षामा पढ्ने ५ वर्षकी युनिका ठगुन्ना, कक्षा १ मा पढ्ने ६ वर्षका सुधीर धामी, कक्षा २ मा पढ्ने ८ वर्षकी निरुता ठगुन्ना र ८ वर्षकी अनिसा धामीको घटनास्थलमै मृत्यु भएको हो । ढक्कन भाँसिदा ढक्कनमाथि राखिएको माटोसहित बालबालिका करिब १० मिटर गहिरो ट्याङ्किमा पुरिएका थिए ।

घटना घटेको समयमा नै थाहा नपाएकाले उद्धार गर्नसमेत तीन घण्टा लागेको सिप्टी चौकीका इन्चार्ज देवदत्त भट्टले जानकारी दिए । अभिभावकले छोराछोरी घर नआएपछि खोज्ने क्रममा खाल्डोमा खसेको अवस्थामा भेटेका थिए ।