काठमाडौँ: उपत्यका खानेपानी लिमिटेड केयुकेएल ले मेलम्चीको पानी धारामा पठाउन सुरु गरेको छ। आइतबार दिउँसो दुई बजेदेखि केयुकेएलले धारामा पानी छोडेको हो। केयुकेएलले ट्याङ्कीमा चढाएको पानी दुई बजेदेखि धारामा पठाइएको केयुकेएलका प्रवक्ता प्रकाशकुमार राईले जानकारी दिए।

नयाँ संरचना तयार भइनसकेको हुँदा पुरानै संरचनाबाट पानी पठाइएको उनले बताए। परीक्षण सफल भएपछि धारामा पानी पठाइएको हो। प्रवक्ता राईले महांकाल चौर, मीन भवन, अनामनगर, बाँसबारी, बालाजु र महाराजगञ्जस्थित रिजर्भ ट्यांकीमा पानी चढाएर वितरण सुरु गरिएको हो।

पहिलो चरणमा चक्रपथभित्र र आसपासका झण्डै दुई लाख धाराका उपभोक्ताले मेलम्चीको पानी पिउन पाउने जानकारी दिए। उनका अनुसार पुरानै पाइपलाइनका १ लाख ८० हजार धारा र नयाँ संरचनाका २० हजार धारामा पानी पठाउन सुरु गरिएको हो।