एजेन्सी । चीनको हुबेई प्रान्तमा आइतबार थप सय जनाले ‘कोरोना भाइरस’को सङ्क्रमणबाट ज्यान गुमाएका छन् । चिनियाँ स्वास्थ्य अधिकारीले दिएको जानकारी अनुसार आइतबार हुबेईमा सय जनाको मृत्यु भएको हो। यससँगै हुबेईमा मात्र कोरोना भाइरसबाट मृत्यु हुनेको सङ्ख्या १ हजार ६ सय ९६ पुगेको छ भने विश्वभर कूल १ हजार ७ सय ७० पुगेको छ ।

आइतबार थप १ हजार ९ सयभन्दा बढीमा उक्त भाइरसको सङ्क्रमण भेटिएको हुबेईका अधिकारीले जनाएको छ। कोरोनाको उत्पत्तिस्थल हुबेईमा हालसम्म सङ्क्रमितको सङ्ख्या ५८ हजार १ सय ८२ पुगेको छ। विश्वभर गरेर यो सङ्ख्या ७१ हजार २ सय ४ पुगेको छ ।

हुबेई प्रान्तको राजधानी उहानबाट सुरु भएको उक्त भाइरसको सङ्क्रमण हाल विश्वका ३० भन्दा बढी मुलुकमा फैलिसकेको छ। उक्त भाइरस नियन्त्रणका लागि प्रयास गरिरहेको भए पनि हालसम्म सफल हुन सकेको छैन ।