प्रदेश नं.३ का प्रदेशसभा सदस्य भँडेलद्धारा गोपनियताको सपथ ग्रहण

हेटौंडा, प्रदेश नं. ३ का नवनिर्वाचित प्रदेशसभा सदस्य कृष्णलाल भँडेलले आइतबार पद तथा गोपनियताको सपथ ग्रहण गर्नु भएको छ । प्रदेश सभा सचिवालयमा आइतबार एक कार्यक्रमको आयोजना गरी प्रदेश ३ का सभामुख सानुकुमार श्रेष्ठले उपनिर्वाचनबाट निर्वाचित प्रदेश सभा सदस्य भँडेललाई पद तथा गोपनियताको सपथग्रहण गराउनु भएको हो ।

सपथ ग्रहणपछि सभामुख श्रेष्ठले साँसद भँडेललाई प्रदेशसभा अँकित लोगो समेत लगाइ दिनुभएको छ । नवनिर्वाचित प्रदेश सभा सदस्य भँडेलले एकबर्षदेखि जनप्रतिनिधि विहीन भक्तपुर क्षेत्र नम्बर १ (क) मा रोकिएका विकासका कामहरुलाई पूर्णता दिने र जनतामूखी काम गर्ने प्रतिबद्धता व्यक्त गर्नुभयो ।

हेटौंडा–१० स्थित प्रदेशसभा सचिवालयमा भएको सपथ ग्रहण कार्यक्रममा उपसभामुख राधिका तामाङ तथा प्रमुख प्रतिपक्षी दल कांग्रेसका संसदीय दलका नेता इन्द्रबहादुर बानियाँ लगायतको उपस्थिति रहेको थियो । १४ मंसिरमा सम्पन्न उपनिर्वाचनमा भक्तपुर–१ (क) बाट कांग्रेसका उम्मेदवार भँडेलले १३ हजार ४ सय ४९ मत ल्याई निर्वाचित हुनुभएको हो । तत्कालिन एमालेका तर्फबाट निर्वाचित प्रदेशसभा सदस्य हरिशरण लामिछानेको निधन भएपछि त्यहाँ उपनिर्वाचन भएको हो ।