११ भदौ २०८३ काठमाडौं – रसुवाको बाढीपछि काठमाडौंका अस्पतालमा घाइतेसँगै बेपत्ता आफन्तको खोजी गर्ने परिवारको भिड बढेको छ। त्रिवि शिक्षण अस्पतालमा ४१ जना घाइते उपचाररत छन् भने राष्ट्रिय ट्रमा सेन्टरमा २० जना घाइते पुगेका छन्।

ट्रमा सेन्टरमा उपचाररत २० जनामध्ये एक जना डिस्चार्ज भएका छन् भने एक जनाको शल्यक्रिया गरिएको छ। यता शिक्षण अस्पतालमा बाढीबाट उद्धार गरिएका १० शव ल्याइएकोमा एक जनाको मात्र पहिचान खुलेको र नौ जनाको पहिचान हुन बाँकी रहेको अस्पतालले जनाएको छ।

आफन्तहरू अस्पतालका सूची, वेबसाइट र सामाजिक सञ्जालमा आफ्नो मान्छेको नाम खोज्दै विभिन्न अस्पताल धाइरहेका छन्। धेरैका लागि अहिले अस्पताल उपचारको थलो मात्र नभई हराइरहेका आफन्तको खबर पर्खने ठाउँ बनेको छ।