२९ चैत,२०८२ काठमाडौं – भारतीय संगीत जगतकी चर्चित गायिका आशा भोसलेको निधन भएको छ। ९२ वर्षको उमेरमा उनको भारतको ब्रिच क्यान्डी अस्पतालमा आइतबार निधन भएको हो।

भारतीय सञ्चारमाध्यमका अनुसार हृदयाघात भएपछि उनलाई शनिबार अस्पतालमा भर्ना गरिएको थियो। उपचारकै क्रममा उनको निधन भएको जनाइएको छ। दशकौँसम्म भारतीय संगीत क्षेत्रमा सक्रिय रहेकी भोसलेले हजारौँ गीतमा स्वर दिएकी थिइन्। शास्त्रीय, पप, गजलदेखि फिल्मी गीतसम्म उनले आफ्नो स्वरमार्फत विशेष पहिचान बनाएकी थिइन्।

उनको निधनसँगै भारतीय संगीत क्षेत्रमा एक युगीन स्वर सधैंका लागि मौन भएको छ। कलाकार, राजनीतिज्ञ तथा शुभेच्छुकहरूले उनको निधनप्रति दुःख व्यक्त गर्दै श्रद्धाञ्जली अर्पण गरिरहेका छन्।