६ असोज २०८३ काठमाडौं — भोटेकोशी तथा त्रिशूली नदीमा आएको बाढी र पहिरोबाट नेपालको पर्यटन क्षेत्रमा ५२ अर्ब ६७ करोड ४५ लाख ७६ हजार ५ सय रुपैयाँ बराबरको प्रारम्भिक क्षति भएको छ। नेपाल पर्यटन बोर्डको द्रूत प्रतिक्रिया टोलीले पर्यटन मन्त्रालयमा बुझाएको प्रारम्भिक प्रतिवेदनअनुसार रसुवा, नुवाकोट, धादिङ र गोरखालगायत क्षेत्रमा होटल, पर्यटन पूर्वाधार, यातायात, पदमार्ग तथा पर्यटन व्यवसायमा ठूलो क्षति पुगेको हो।

सबैभन्दा बढी होटल क्षेत्रमा १९ अर्ब ५६ करोड रुपैयाँभन्दा बढी क्षति भएको आकलन गरिएको छ। त्यस्तै वैदेशिक पर्यटन आम्दानीतर्फ १४ अर्ब ६० करोड र मानवबल तथा पर्यटक व्यवस्थापनतर्फ १२ अर्ब २६ करोड रुपैयाँभन्दा बढी क्षति भएको प्रतिवेदनमा उल्लेख छ।

बाढी तथा पहिरोबाट १ हजार १ सय १७ नेपाली तथा विदेशी प्रभावित तथा सम्पर्कविहीन भएकोमा ३ सय १० जनाको उद्धार गरिएको छ। प्रतिवेदनले प्रभावित पर्यटन क्षेत्रको पुनरुत्थानसँगै जलवायु–अनुकूल पूर्वाधार, पूर्वसूचना प्रणाली र पर्यटक सुरक्षामा जोड दिन सुझाव दिएको छ।